8 Augustus 2024
Die Suid-Afrikaanse Inkomstediens (SAID) sê ‘n datum moet nog vasgestel word vir die instel van 45%-invoertariewe – plus BTW – op kleinmaat klere-invoere van Chinese handelsmerke soos Shein en Temu.
‘n Woordvoerder van die SAID, Siphithi Sibeko, sê die agentskap is nog besig om met rolspelers in die bedryf te konsulteer voordat die tarief op ingevoerde klere, tekstiele en skoene – wat minder as R500 kos – verhoog word.
Sibeko sê die agentskap wil nie eensydig op ‘n datum besluit nie. Hy sê dit wil voorkom asof daar verwarring is oor wanneer dié tariewe in werking gaan tree, met sommige verbruikers wat glo dat dit reeds in werking getree het.
Suid-Afrika se sukkelende klerebedryf doen reeds lank ‘n beroep op die regering en die inkomstediens om strenger op te tree teen Shein, Temu en soortgelyke handelsmerke, omdat hulle nie noodwendig aan dieselfde belastingvoorwaardes voldoen nie.
Tans is dié handelsmerke se invoerbelasting tot 20% minder as ander handelsmerke.
