4 Augustus 2022
Die Suid-Afrikaanse Gesondheidsprodukte Regulerende Owerheid (SAHPRA), sê hulle het bewus geraak van ‘n sterfte, wat direk verbind kan word aan die Covid-19-entstof, Janssen.
Sahpra het vanoggend ‘n mediakonferensie gehou waarin hulle die voorval bespreek het. Volgens die organisasie is die betrokke persoon met Guillian-Barré Sindroom (GBS) gediagnoseer nadat hy/ sy met die Janssen entstof ingeënt is.
Weens dokter pasiënt vertroulikheid kan die persoon se ouderdom en sy tuis-provinsie nie bevestig word nie.
GBS is ‘n seldsame afwyking waarin die persoon se immuunstelsel sy senuwees aanval. Die eerste simptome is ‘n prikkelende gevoel in die hande en voete, en versprei vinnig na die res van die liggaam.
Prof. Hannelie Meyer, verbonde aan Sahpra het verduidelik dat ‘n Nasionale Inentingsveiligheidskomitee (NISEC) op die been gebring is en dat hulle die GBS-geval ondersoek het.
Die Janssen-maatskappy, wat die Janssen entstof ontwikkel het, het in Oktober 2021 ‘n kennisgewing uitgereik waarin hulle sy gebruikers ingelig het van die risiko’s verbonde aan dié entstof. Volgens die kennisgewing is daar gevalle van immuun trombositopenie (ITP) en veneuse trombo-embolisme (VTE) aangemeld.
Sahpra sê hulle moedig steeds mense aan om die Covid-19-inenting te kry omdat die voordele steeds meer is as die risiko’s.
