3 Oktober 2024
Die korrupsiesaak teen die voormalige minister van sport, kuns en kultuur, Zizi Kodwa, en sy medebeskuldigde, Jehan Mackay, is tot die 24ste Oktober uitgestel.
Dit volg nadat dié twee vandag vlugtig in die Palm Ridge-landdroshof verskyn het.
Kodwa word daarvan aangekla dat hy omkoopgeld ter waarde van R1,7-miljoen van Mackay ontvang het in ruil vir staatstenders.
Mackay het vertoë gerig om die bedrog- en korrupsiebewerings teen hom te laat vaar.
Met Kodwa se laaste verskyning het sy regsadviseur sy ontevredenheid oor die voortdurende vertragings uitgespreek.
Kodwa se advokaat het egter gedreig om ‘n aansoek vir ‘n skeiding van die twee se verhore te bring, weens die vertragings.
