16 Mei 2023
Die sogenaamde Facebook-verkragter, Thabo Bester het vanoggend virtueel in die landdroshof in Bloemfontein verskyn vir sy borgtogaansoek.
Hy is tans in die Kgosi Mampuru-gevangenis in Pretoria. Volgens berigte was hy aanvanklik baie ongelukkig omdat hy virtueel moet verskyn, en dat hy nie self in die hof kan wees nie.
LEES OOK: “FACEBOOK VERKRAGTER” ONTSNAP AS “TRONKBEWAARDER”
Sy prokureur, Ryan Ishmail het ook vanoggend as sy regsverteenwoordiger onttrek. Volgens hom het hy reeds ‘n nuwe regsverteenwoordiger, advokaat Tsoeunyane Phela aangestel. Volgens Phela het hulle die virtuele verskyning teengestaan.
Phela het gevra dat die saak tot Woensdag uitgestel word, sodat Bester na die hof gebring kan word.
Die staatsaanklaer, Sello Matlhoko sê hy verstaan dit egter nie omdat Bester se regsverteenwoordigers reeds vroeër ingelig is dat hy virtueel sal verskyn. Sy saak is tot 20 Junie uitgestel.
LEES OOK: LIGGAAM IN SEL IS ONREGMATIG DEUR “FACEBOOK-VERKRAGTER” SE VRIENDIN OPGEËIS
Sy vriendin, dr Nandipha Magudumana het virtueel verskyn, en haar saak is ook tot 20 Junie uitgestel. Haar pa, Cornelius Sekeleni is reeds vroeër op borgtog vrygelaat, maar verskyn ook vandag in die hof.
Die ander beskuldigdes is die voormalige tronkbewaarder van G4S, Senohe Matsoara, ‘n kringtelevisie-tegnikus, Teboho Lipholo, ‘n veiligheidswag van die tronk, Motenyane Masukela, en twee voormalige G4S-werknemers, Tieho Makhotsa en Natassja Jansen. Hulle borgtogaansoeke word vandag aangehoor.
