23 November 2023
Die Nasionale Vervolgingsgesag (NVG) se ondersoekdirektoraat sê hy verwag om die Kusile-kragstasie-korrupsiesaak – van R2,2-miljard waarby die voormalige uitvoerende hoof van Eskom, Matshela Koko, betrokke is – weer op die hofrol te plaas.
Dit kom nadat die gespesialiseerde handelsmisdaadhof in Middelburg, Mpumalanga, dié saak vroeër die week van die rol geskrap het, maar beklemtoon het dat dit nie ‘n vryspraak of terugtrekking van die aanklagte beteken nie.
Die NVG se woordvoerder, Sindisiwe Seboka, sê dat die ondersoekdirektoraat sy ondersoek in ooreenstemming met sy oorspronklike strategie vir die saak sal voortsit.
Verskeie organisasies soos Solidariteit, Outa en Corruption Watch het die kapasiteit en hulpbronne van die NVG – om ingewikkelde sake te hanteer – bevraagteken.
