10 Oktober 2023
Die Suid-Afrikaanse regering het appèl aangeteken teen die besluit dat die land nie voldoen aan die Wêreldagentskap teen die gebruik van verbode middels (WADA) se vereistes nie.
Die minister van sport, kuns en kultuur Zizi Kodwa het dit vandag tydens ‘n mediakonferensie bevestig.
WADA se voldoeningskomitee het in September opdrag gegee dat Suid-Afrika voor 13 Oktober sy wetgewing rakende die gebruik van verbode middels moet wysig, om te voldoen aan die vereistes.
Indien daar nie aan die vereistes voldoen word nie, verloor Suid-Afrikaanse sportspanne die voorreg om onder hul eie landsvlag deel te neem aan groot sportgeleenthede, en verloor Suid-Afrika ook die reg om gasheer te speel vir toekomstige toernooie.
Suid-Afrika se wetgewing is in 2022 deur WADA geoudit, en daar is toe bevind dat daar sekere tekortkominge is.
Die agentskap se kode is al in 2021 opgedateer, en Suid-Afrika het dus twee jaar gehad om sy eie wetgewing te wysig. Dit blyk egter of iemand gesloer het om die wetgewing te wysig en goedgekeur te kry.
Oor die gesloer het Kodwa gesê dat daar ondersoek ingestel sál word.
“Ons gaan nie spekuleer oor wat gebeur het nie. Die ondersoek moet vasstel hoekom daar nie vroeër opgetree is nie” het Kodwa gesê.
Kodwa sê ook die besluit om te appelleer is nie om die proses net langer uit te rek nie, maar eerder om ‘n permanente oplossing te vind.
“Ons wil die nie-nakoming oplos. Ons verbintenis teen die gebruik van opkikkers moet nie bevraagteken word nie” het hy gesê.
Die wysigings is reeds deur die kabinet goedgekeur, maar moet nou deur die parlement verwerk word.
Die proses kan na raming nog tot Mei volgende jaar duur, omdat dit ook onderwerp moet word aan ‘n openbare deelname proses.
