26 Januarie 2023
Die President van die reserwebank, Lesetja Kganyago het aangekondig dat dié bank se terugkoopkoers van môre af met 25 basispunte, oftewel 0,25 persentasiepunte, sal styg van 7% af na 7,25%.
Kommersiële banke sal dienooreenkomstig hulle rentekoerse aanpas met die prima-uitleenkoers wat van 10,5% na 10,75% sal styg.
Kganyago het tydens sy algehele oorsig daarop gewys dat verhoogte beurtkrag die land se ekonomiese groei in 2023 met tot soveel as 2-persentasiepunte gaan kniehalter.
Die bank het sy verwagte groei van die bruto-binnelandse produk gesny en skat dit nou op 0,3%.
Die sentrale bank verwag dat die hoë inflasiekoers in die tweede kwartaal effe sal afplat.
