24 November 2022
Die Suid-Afrikaanse Reserwebank se Monetêre Beleidskomitee het besluit om die bank se terugkoopkoers met ‘n verdere 75 basispunte te verhoog, wat die repokoers tot op 7%, en die prima uitleenkoers tot 10,5% laat styg.
Rentekoerse in die land is nou bo vlakke waar dit voor die uitbreek van die Covid-19 pandemie was.
Die president van die reserwebank, Lesetja Kganyago het na afloop van die komitee se laaste vergadering van die jaar gesê komiteelede was verdeeld oor die besluit en terwyl drie lede vir die gegewe verhoging gestem het, het twee vir ‘n verhogong van vyftig basispunte gestem.
Vandag se koersverhoging is die agtste verhoging in die huidige siklus, met die totale aanpassing wat 350 basispunte is sedert die verhogingsiklus ‘n jaar gelede in November 2021 begin het.
Kganyago het gesê die styging kom te midde van hoë vlakke van inflasie in Suid-Afrika en ‘n wisselvallige globale ekonomiese vooruitsig vir die jaar wat voorlê.
Hy sê Suid-Afrika se ekonomiese groeivooruitsigte lyk swak, hoofsaaklik as gevolg van hoë vlakke van beurtkrag.
