20 Augustus 2024
Die minister van finansies, Enoch Godongwana sê die regering skuld nagenoeg R18,6-miljard rand aan munisipaliteite vir agterstallige dienstegeld en belasting.
Godongwana het in reaksie op ‘n parlementêre vraag van die EFF gesê dié bedrag was aan die einde van Junie uitstaande en sluit agterstallige skuld van staatsbeheerde ondernemings in.
Volgens die minister maak artikel 71 van die Wet op Munisipale Finansiële Bestuur nie voorsiening vir ‘n afbetalingsplan tussen staatsorgane en munisipaliteite nie.
Godongwana se openbaring staan in teenstelling met president Cyril Ramaphosa se staatsrede in Februarie – waarin hy uitgevaar het teen swak bestuur by munisipaliteite – wat daartoe lei dat hulle miljarde rand aan nutsdiensmaatskappye skuld.
