13 Mei 2024
President Cyril Ramaphosa sê beurtkrag, wat reeds vir langer as 45 dae opgeskort is, is danksy die samewerking tussen verskeie rolspelers.
Hy skryf in sy weeklikse nuusbrief dat die opskorting van beurtkrag ‘n teken is dat die regering se Kragplan, wat in 2022 bekendgestel is, wél werk.
“Dit is nog te vroeg om te sê of beurtkrag verewig weg is, maar die voortdurende verbetering in die opwekkingsvermoë van Eskom se kragstasies gee vir ons hoop dat die einde van beurtkrag nie te ver weg is nie.”
Ramaphosa sê ondanks die bewyse dat Eskom beter vaar, en meer krag opwek is daar opposisiepartye en ander rolspelers wat aanvoer dat die opgeskorte beurtkrag ‘n verkiesingsfoefie is. “Daar is steeds mense wat beweer dat beurtkrag opgeskort is omdat Eskom die dieselaangedrewe noodkragstasies gebruik om dit voor die verkiesing moontlik te maak.”
Hy het egter benadruk dat dit nie die geval is nie, en dat die kragvoorsiener dié noodkragstasies minder gebruik as in die afgelope twee jaar.
