26 Julie 2022
Die regering se plan om die kragkrisis op te los, is wyd verwelkom, hoewel opposisiepartye en nie-regerings organisasies sê die implementering daarvan moet met valkoë dopgehou word.
President Cyril Ramaphosa het gisteraand die land toegespreek te midde van die kragprobleme.
Volgens die plan sal Eskom op die korttermyn ekstra krag aankoop by buurlande, lisensies vir privaatkragopwekking sal heeltemal verwyder word, en die hoeveelheid krag wat via die staat se sesde bodronde vir hernubare krag aangekoop sou word, sal van 2 600 MW tot 5 200 MW verdubbel word.
Intussen het die vakbond Solidariteit Ramaphosa se plan verwelkom, en sê ʼn meer gedesentraliseerde stelsel vir kragopwekking is die enigste werkbare en volhoubare oplossing tot Suid-Afrika se kragkrisis.
LEES OOK: RAMAPHOSA KONDIG DRINGENDE INGRYPINGS AAN TE MIDDE VAN KRAGKRISIS
Die bestuurshoof van Solidariteit, dr. Dirk Hermann sê die privaat sektor en gemeenskappe kan nou skeppende en veerkragtige oplossings vir die krisis bied.
Die VF Plus sê intussen die plan wat die president aangekondig het, is te min, te laat. Die party bevraagteken of die regering oor die vermoë beskik om die plan uit te voer en te implemente.
Die VF Plus leier dr Pieter Groenewald het wel die besluit verwelkom om nie nog ‘n ramptoestand af te kondig nie. Die DA het die plan verwelkom, maar eis dat die implementering daarvan deursigtig moet wees.
Die party versoek ook dat die parlement ‘n komitee aanstel om oorsig te bied oor die nasionale energie krisis komitee, wat Ramaphosa aangekondig het.
