11 Maart 2024
Die Presidensie sê die regering het meer as R10-miljoen opgedok vir Direkteurs-generaal wat die afgelope paar jaar met volle betaling geskors is.
Dit is onthul in ‘n geskrewe parlementêre antwoord op ‘n vraag van die DA. Die betrokke inligting is van toepassing op die tydperk van die 2020/21-boekjaar, tot die 2022/23-boekjaar.
Hoewel daar verskeie skorsings is wat die wenkbroue laat lig het, is daar enkeles wat uitgestaan het.
Dit sluit dié van die DG vir verdediging en militêre veterande, Irene Mpolweni, wat sedert Maart verlede jaar geskors is en die DG van openbare ondernemings, Kgathatso Tlhakudi, wat ook ‘n jaar met betaalde verlof was voordat hy afgedank is.
Die DA se dr Mimmy Gondwe het in reaksie hierop gesê dat dit onaanvaarbaar is dat daar van die belastingbetaler verwag word om pa te staan vir die kostes.
