7 Februarie 2022
‘n Paneel kundiges wat deur president Cyril Ramaphosa aangestel is om die Julie 2021-onluste te ondersoek, het onder andere bevind dat die reaksie deur die polisie en intelligensiedienste – ontoereikend en onvoldoende was.
Die president het vanoggend opdrag gegee dat die verslag openbaar gemaak mag word.
Die paneel – onder leiding van professor Sandy Africa – sê die redes waarom die polisie nie daarin kon slaag om die oproer en plundery stop te sit nie, is ingewikkeld en kan nie losstaande van mekaar hanteer word nie.
In die verslag word daar ook melding gemaak van die gelyktydige skorsing van minstens ses senior amptenare in misdaadintelligensie gedurende die voorafgaande periode.
Nóg een van die paneel se bevindings is dat die polisie nie voorbereid was nie, dat hulle onkant betrap is en – toe die skarebeheertoerusting onvoldoende was – was hulle taktiek nie aanpasbaar nie.
Ramaphosa se uitvoerende gesag word ook gekritiseer weens sy onvermoeë om duidelike skeidslyne te handhaaf met die veiligheidsdienste.
