30 April 2024
Solidariteit sê die regering se konsepregulasies oor sektorale numeriese rasteikens verontagsaam die skikking wat verlede jaar bereik is.
Volgens die organisasie se adjunkbestuurshoof, Anton van der Bijl, is daar in kommentaar oor die regulasies – wat deur Solidariteit ingedien is – duidelik uiteengesit hoe dit teenstrydig is met internasionale reg oor diskriminasie in die werkplek.
Die tydperk om kommentaar te lewer oor die regulasies wat verband hou met die Wysigingswet op Gelyke Indiensneming – wat in Februarie in die Staatskoerant gepubliseer is – verstryk later vandeesweek.
Van der Bijl sê terwyl die probleem by die inhoud van die regulasies lê, is dit boonop voortydig gepubliseer aangesien die wysigingswet nog nie deur die president in werking gestel is nie.
