13 Februarie 2023
Die regering het ‘n nasionale ramptoestand afgekondig oor die verwoestende en buitengewone reënweer wat die afgelope week in dele van die land uitgesak het.
Die hoof van die nasionale rampbestuursentrum, dr Elias Sithole, het die nuus vanaand in die Staatskoerant gepubliseer.
Volgens Sithole het voorvalle van oorstromings in die Oos-Kaap, Vrystaat, Gauteng, KwaZulu-Natal, Limpopo, Mpumalanga en die Noordwes-provinsie veroorsaak dat mense hul lewens verloor, vermis raak en dat eiendom, infrastruktuur en die omgewing beskadig word.
Ingevolge die Wet op Rampbestuur van 2002, sal die afkondiging van ‘n nasionale ramptoestand die regering help om die nagevolge van die oorstromings in ‘n intensiewe en gekoördineerde manier aan te pak.
