9 Februarie 2023
President Cyril Ramaphosa het ‘n noodtoestand afgekondig sodat die regering kan reageer op die kragkrisis wat die land tans lamlê.
Die minister van samewerkende regering en tradisionele sake, dr. Nkosazana Dlamini-Zuma het reeds die afkondiging van die noodtoestand in die Staatskoerant gepubliseer.
Volgens Ramaphosa sal die herstrukturering van Eskom voortgaan. Hy meen ‘n ramptoestand sal die regering in staat stel om praktiese stappe te doen om die krisis te probeer oplos. In ‘n poging om verder ‘n einde aan die krisis te bring, sal ‘n minister van elektrisiteit in die presidensie aangestel word om die kragkrisis te bestuur.
Intussen het die vakbond Solidariteit aangekondig dat sy regspan reeds vanaand sal begin met voorbereiding vir ‘n regsproses teen die ramptoestand.
Solidariteit se bedryfshoof, dr. Dirk Hermann sê rampwetgewing is nie bedoel vir swak bestuur nie. “Alles wat gedoen moet word kan gedoen word sonder ‘n ramptoestand. Alles wat vanaand afgekondig is kan sonder ‘n ramptoestand gedoen word,” sê Hermann.
Hy meen die vakbond ondersteun ingrypende stappe om die kragkrisis op te los, maar meer staat is nie die antwoord nie. Volgens Hermann is meer privaat-ingryping en minder staat nodig.
Eskom se woordvoerder, Sikonathi Mantshantsha het in reaksie op die aankondiging gesê dat die kragvoorsiener die afkondiging in die Staatskoerant sal bestudeer, voordat hulle verder kommentaar sal lewer.
