26 September 2022
President Cyril Ramaphosa het Suid-Afrikaners gevra om geduldig te wees, terwyl die regering met oplossings vorendag kom vir die kragkrisis.
Ramaphosa het die afgelope naweek in sy Erfenisdag toespraak gesê hy verstaan die huidige vlaag van beurtkrag ontwrig almal se lewens, maar dat Suid-Afrikaners net ‘n bietjie langer moet vasbyt, soos ons in die verlede ook al gedoen het.
LEES OOK: BEURTKRAG-SITUASIE SAL BINNEKORT VERBETER, SÊ PRAVIN GORDHAN
Hy sê die regering sal binnekort ‘n rits stappe aankondig, om die ingewikkelde kragkrisis die hoof te bied.
Eskom het gistermiddag in ‘n verklaring bevestig dat fase 3-beurtkrag steeds sal geld tussen 24:00 en 16:00 daagliks tot Donderdag.
Fase 4 sal ook daagliks ingestel word gedurende spitstye vanaf 16:00 tot middernag, ook tot Donderdag.
