18 Julie 2024
President Cyril Ramaphosa sê die Regering van Nasionale Eenheid (RNE) sal voortgaan om die Nasionale Gesondheidsverseking (NGV) in werking te stel.
Ramaphosa het ‘n kort ruk gelede sy parlementêre openingstoespraak in die stadsaal in Kaapstad gelewer.
Hy sê hoewel die Nasionale Gesondheidsversekering tot groot debat lei, is daar ooreenstemming dat beide die privaat en die openbare sektor betrokke moet wees by die oplossing vir gesondheidsorg in Suid-Afrika.
Ramaphosa het bygevoeg dat die partye eers konsensus sal moet bereik, voor daar besluite geneem sal word oor kwessies soos die NGV.
Hy het verder gesê dat ekonomiese groei en werkskepping een van die belangrikste prioriteite is.
Hy sê dit is veral nywerhede en die landbousektor wat werk sal moet skep. Verder het hy belowe dat die RNE munisipaliteite en metros sal regruk.
