12 April 2023
Die presidensiële woordvoerder, Vincent Magwenya, sê president Cyril Ramaphosa het die Wetsontwerp op Gelyke Indiensneming as wet onderteken.
Magwenya sê die nuwe wet is daarop gemik om diversiteit en gelykheid in die werkplek te bevorder en dit sal die regering bemagtig om spesifieke billikheidsteikens volgens sektor en streek te stel, waar transformasie-inisiatiewe agterweë gebly het.
Van die belangrikste wysigings is dat maatskappye met meer as vyftig werknemers diensbillikheidsplanne vir hul maatskappye moet indien oor hoe om hierdie teikens te bereik, en dan jaarverslae by die Departement van Indiensneming en Arbeid voorlê.
Dit geld nie vir ondernemings met minder as vyftig personeel lede nie – ongeag hulle omset.
Vir die groot ondernemings wat onder die definisie van ‘n aangewese werkgewer val, is die grootste verandering die bemagtiging van die minister van indiensneming en arbeid om sektoriële ekonomiese bemagtigings-teikens en voldoeningskriteria te reguleer.
Dit beteken dat ekonomiese bemagtigings-teikens vir verskillende sektore aan die minister se oordeel oorgelaat sal word.
Hoewel hierdie teikens nog nie bekend is nie, sal aangewese werkgewers die regulasies wat die minister instel, noukeurig moet dophou, aangesien dit ‘n beduidende praktiese invloed het op die wyse waarop hulle aan die wet moet voldoen.
Selfs besighede wat nie noodwendig direk met die staat handel nie, sal hieraan gebonde wees.
Die bedryfshoof van Solidariteit, dr. Dirk Hermann het in reaksie op die nuus gesê dat hierdie wetgewing “drakoniese rasmagte” aan die regering gee. Volgens Hermann het die vakbond reeds begin om litigasie voor te berei, en sal binnekort hofstukke beteken.
“Solidariteit het ook op 23 Augustus 2022 aan die president geskryf en hom daarop gewys dat die wysigings ongrondwetlik is.” Solidariteit het ook ‘n regsopinie verkry wat dit bevestig. Die President is dus bewus dat Solidariteit hof toe gaan as hy die wetgewing sou teken. Hy het dit nou inderdaad gedoen en ons berei nou vir die hof voor.”
