26 Augustus 2024
President Cyril Ramaphosa sê alle Suid-Afrikaners moet daarna streef om soos hoofregter Raymond Zondo te werk vir ‘n regverdiger, billiker en etiese nasie.
Zondo tree amptelik op 31 Augustus af as hoofregter. Ramaphosa skryf in sy weeklikse nuusbrief dat Zondo ‘n uitstekende loopbaan gehad het, maar meen een van sy mees prominente en uitstaande bydraes was as voorsitter van die Zondo-kommissie van ondersoek na staatskaping.
Hy sê deur Zondo se rol as voorsitter het hy dit vir Suid-Afrikaners maklik gemaak om die impak van staatskaping te verstaan, en om toe te sien dat dit nie weer plaasvind nie.
Volgens Ramaphosa was die staatkapingskommissie ‘n reuse taak met 400 dae van sittings, meer as 300 getuies en meer as 1,7-miljoen bladsy van bewyse.
“Regter Zondo het standaarde van etiese gedrag, aanspreeklikheid en deursigtigheid daargestel wat ons in staat stel om ‘n beter samelewing te bou.” Ramaphosa sê sedert Zondo die verslag oorhandig het, is daar hard gewerk om die aanbevelings te implementeer.
Hy sê hy het die afgelope paar maande verskeie wette goedgekeur wat ‘n direkte gevolg is van die verslag. Ramaphosa sê hoewel baie reeds gedoen is, is daar nog meer wat gedoen moet word om te verseker dat staatskaping nooit weer gebeur nie.
“Zondo kan aftree met die wete dat hy sy land trots gemaak het met ‘n diens van onskatbare waarde.”
