22 Januarie 2024
Opposisiepartye het uitgevaar teen die gebruik van die lugmag se BBP-straler om president Cyril Ramaphosa en adjunkpresient Paul Mashatile tydens die ANC se verjaarsdagvieringe rond te karwei.
Berigte hieroor het die afgelope naweek in die media verskyn. Volgens die berigte is daar in die aanloop tot die viering tien vlugte glo tussen Kaapstad, Mbombela en Waterkloof in Pretoria onderneem.
Die leier van die VF Plus, dr. Pieter Groenewald het in reaksie hierop gesê dat hy dit as ‘n vermorsing van belastingbetalersgeld beskou en dat hy die openbare beskermer hieroor sal nader.
Hy meen die regering kla jaarliks oor ‘n tekort aan geld, maar dat die fondse tot hulle beskikking – volgens Groenewald – vermors word op hierdie tipe uitstappies.
Volgens die DA se woordvoerder oor verdediging en miltêre veterane, Kobus Marais, beteken dit nie dat daar misbruik van gemaak moet word indien die vliegtuie tot die leiers se beskikking gestel word nie.
‘n Woorvoerder van die presidensie, Vincent Magwenya het na die presidensiële handleiding verwys, waarvolgens dit die lugmag se verantwoordelikheid is om lugvervoer aan dié land se hoofleiers te verskaf.
