23 Maart 2023
Die leier van die EFF, Julius Malema sê president Cyril Ramaphosa is korrup, onbevoeg en geweldadig, en meen indien hy aanbly as president sal hy die land tot in ‘n diktatorskap lei.
Malema het vroeër vandag ‘n mediakonferensie gehou ná sy party se nasionale eendagstaking van Maandag. Verskeie rolspelers, insluitend die ANC se sekretaris-generaal, Fikile Mbalula het die staking as ‘n mislukking bestempel.
Malema het egter benadruk dat die staking volgens die EFF ‘n reuse sukses was, en dat Maandag nié ‘n normale werksdag was nie.
Volgens hom sal die party deurlopend optree teen Ramaphosa en hom verantwoordbaar hou.
Hy het ook weer die ontplooiing van die weermag bevraagteken. Ramaphosa het verlede week aangekondig dat die weermag tot en met die 17de April ontplooi sal word om wet en orde te handhaaf. Dit sal die land R166-miljoen kos.
Volgens Malema moet die president verduidelik waarom die belastingbetaler se geld vermors word. Hy meen die EFF se staking was een dag, daarom kan hy nie verstaan waarom die weermag ‘n maand lank diens moet doen nie.
