26 Januarie 2022
Die burgerregteorganisasie, AfriForum en die Mafube Besigheidsforum sal môre president Cyril Ramaphosa en 16 ander respondente in die Bloemfonteinse hooggeregshof uitdaag oor dienslewering in die Mafube-plaaslike munisipaliteit, wat onder andere Frankfort bedien.
Volgens AfriForum was Frankfort eens ‘n spogdorp, maar tans word geen dienste gelewer nie en die munisipaliteit is volgens die organisasie feitlik bankrot.
Slaggate, gereelde watertekorte, ’n gebrek aan vullisverwydering en ’n wanfunksionerende rioolstelsel is maar enkele van die probleme wat inwoners van dié dorp ervaar.
Die Mafube Besigheidsforum bring dié hofaansoek namens die inwoners van Frankfort.
Volgens Jacques Jansen van Vuuren, skakelbeampte van die Mafube Besigheidsforum, word daar vir omvattende regshulp gevra.
“Ons versoek onder meer ’n bevel wat ons die reg sal gee om vir ’n beperkte tydperk ’n verskeidenheid van munisipale dienste te bestuur totdat daar vanaf nasionale vlak ingegryp word om dienslewering reg te ruk,” sê Jansen van Vuuren.
