4 Oktober 2022
Die Kruger Laeveld Sakekamer het ‘n R50 000 beloning aangebied vir inligting wat kan help om diegene vas te trek wat gister ‘n Duitse toeris naby Witrivier in Mpumalanga doodgeskiet het.
Die uitvoerende hoof van die KLCBT, Linda Grimbeek, sê sy hoop dat die beloning mense sal bemoedig om na vore te kom met inligting.
Dit volg nadat drie gewapende mans gister probeer het om ‘n groep Duitse toeriste te kaap terwyl hulle op pad was na die Mdluli Safari Lodge naby die Krugerwildtuin se Numbi-hek.
LEES OOK: DUITSE TOERIS IN MPUMALANGA DOODGESKIET
Die bestuurder van die motor, een van die vier Duitse toeriste wat in die motor was, is in die bolyf geskiet toe hy geweier het om die deure van die motor oop te sluit.
Die aanvallers het van die toneel weggejaag sonder om iets te neem.
Volgens Grimbeek is die ander drie toeriste tans by ‘n veilige hawe. Die Duitse ambassade in Suid-Afrika en Suid-Afrikaanse owerhede bied ook ondersteuning aan dié toeriste.
Intussen het die voorval ook internasionale media bereik met Duitse koerante wat berig dat Duitsers- en owerhede woedend is. Rolspelers in die toerismebedryf is verder bekommerd oor die uitwerking wat die moord op die toerismebedryf kan hê.
