5 Oktober 2022
‘n 37-jarige man is gister by die Kaapstad Internasionale Lughawe in hegtenis geneem nadat die polisie dwelms ter waarde van byna R2,5-miljoen in sy besit gekry het.
Volgens die polisie se woordvoerder, adjudant-offisier Joseph Swartbooi het lede van die polisie se dwelm-eenheid ‘n wenk ontvang van ‘n passasier wat vermoedelik handel in dwelms by die lughawe.
Die beamptes het passasiers wat gistermiddag van ‘n internasionale vlug vanaf Dubai afgeklim het ondersoek en vier kilogram kokaïen in die man se besit gevind.
Volgens die polisie was die dwelms in sjokoladeverpakking in die verdagte se bagasie versteek.
Die man sal na verwagting binnekort in die Bellville-landdroshof verskyn op aanklag van dwelmhandel.
