24 Januarie 2024
Die Ouditeur-generaal en die Vrystaatse regering het verskeie geboue en projekte in dié provinsie geïdentifiseer wat nié instand gehou word nie.
Die Fezile Dabi-stadion in Parys is tans in onbruik nadat dit amptelik in 2013 geopen is teen ‘n bedrag van R261-miljoen. Foto’s wat deur die VF Plus-lid van die wetgewer, Armand Cloete versprei is wys die duidelike verval van die stadion.
‘n Woordvoerder in die kantoor van die OG, Luthando Mbandazayo sê dié kantoor het ingevolge die Wet op Openbare Finansiële Bestuur ’n inligtingsessie in Bloemfontein aangebied oor die oudit-uitkomste van die Vrystaat vir die jaar tot 31 Maart 2023.
Cloete sê die uitkoms van die OG se verslag bevestig die VF Plus se standpunt dat kundige amptenare en kontrakteurs, en nie ANC-kaders, aangestel moet word om Vrystaatse infrastruktuur te bou en verbeter.
“Die feit dat departement van sport, kuns en kultuur, wat destyds die stadion gebou het, tot dusvêr geen ondersoek na hierdie vrugtelose uitgawe geloods het nie, wys die ANC kan en wil nie verantwoordelikheid aanvaar vir sy plundering van die Vrystaat die afgelope 30 jaar nie,” meen Cloete.
