21 Mei 2021
Die departement van verdediging en militêre veterane sê hy het meer as R1-miljard die afgelope tien jaar aan Kubaanse diensverskaffers spandeer as deel van projek Thusano om toerusting te versien.
Dit was in antwoord op ‘n parlementêre vraag deur die DA.
Dié party se woordvoerder oor verdediging, Kobus Marais, sê dit is onverklaarbaar hoekom sulke take aan die Kubane uitgekontrakteer word terwyl die Suid-Afrikaanse krygstuig-verskaffers ten gronde gaan weens ‘n gebrek aan geld.
Vroeër vandeesmaand het Marais gesê hy het betroubaar verneem dat die weermag se militêre bevelsraad weier om met die Openbare Beskermer se kantoor saam te werk in die ondersoek na meer as R200-miljoen se ongeregistreerde medisyne wat van die eilandstaat aangekoop is wat as teenvoeter teen Covid-19 moes dien.
Verlede maand moes die minister van menslike nedersettings, water en sanitasie, Lindiwe Sisulu, bontstaan om te verduidelik waarom sy twee-dosyn Kubaanse ingenieurs die land ingebring het om te help met water-kwessies terwyl Suid-Afrikaanse ingenieurs sonder werk sit.
‘n Hofsaak in dié verband met Solidariteit as aansoeker sal op 1 Junie aangehoor word.
