Die Tshwane-metro sê hy ondervind tans skakelingsprobleme wat daartoe lei dat talle inwoners nie voorafbetaalde elektrisiteit kan aankoop nie.
Tegnici by die stad sê die probleem word veroorsaak deur ‘n stukkende veselkabel wat vandale tussen die stad se datasentrum en die staat se inligtingsagentskap beskadig het.
Volgens die raad is dit die tweede voorval van dié aard die afgelope week, en die derde een die afgelope drie weke.
Na verwagting sal die fout deur die loop van die dag herstel word en het die metroraad inwoners wat sukkel gevra om geduldig te wees.
Volgens die metro sal bykomende lede van die metropolisie ontbied word om soortgelyke voorvalle te probeer fnuik.
