11 April 2023
Suid-Afrikaanse owerhede het met die proses begin om die voortvlugtige, Thabo Bester, te laat deporteer, ná sy onlangse in hegtenisneming in Tanzanië.
Bester staan as die “Facebook-verkragter” bekend omdat hy die platform gebruik het om sy slagoffers te lok. Hy is sedert Mei verlede jaar vermis nadat hy in die Mangaung Korrektiewe Sentrum in Bloemfontein, sy eie dood gefnuik het.
LEES OOK: VEILIGHEIDSMAATSKAPPY DAAG NIE OP VIR SITTING OOR DIE ONTSNAPPING VAN “FACEBOOK-VERKRAGTER” NIE
‘n Hoëvlak-afvaardiging – wat uit verskeie wetstoepassingsowerhede saamgestel is – is in Tanzanië om Bester en sy vermeende medepligtige, Dr Nandipha Magudumana, terug te bring na Suid-Afrika.
In samewerking met die Tanzaniese owerhede sal die afvaardiging die vinnigste manier probeer vind om Bester terug in Suid-Afrika te kry om die res van sy vonnis uit te dien, en ook bykomende klagte in die gesig te staar.
Volgens regskenners sal deportasie – in teenstelling met ‘n veel langer uitleweringsproses – die makliker opsie wees om hom terug in die land te kry.
LEES OOK: KABINET IS VERLEË OOR ONTSNAPPING VAN “FACEBOOK-VERKRAGTER,” SÊ MINISTER
Intussen verskyn twee mense vandag in die Bloemfontein-landdroshof in verband met Bester se ontsnapping. Volgens die polisiewoordvoerder Athlenda Mathe sal die twee ondermeer van medepligtigheid en dwarsboming van die gereg aangekla word.
Een van die mense wat die naweek in hegtenis geneem is, is die pa van Bester se vriendin.
