23 Mei 2024
Die prokureur wat die DA hof toe neem oor sy omstrede advertensie wat die brand van die Suid-Afrikaanse vlag uitbeeld, Zuko Madikane is in September verlede jaar skuldig bevind daaraan dat hy homself as ‘n prokureur voorgedoen het.
Madikane was een van twee “regsverteenwoordigers” wat daaraan skuldig bevind is dat hulle ‘n sakeman, Kagiso Galesitoe uit R88 000 bedrieg het. Hy is in die Johannesburg landdroshof tot drie jaar gevangenisstraf gevonnis, wat vir vyf jaar opgeskort is. Hy is ook beveel om R44 000 in skadevergoeding aan Galesitoe te betaal.
Galesitoe, wat die eienaar van die restaurant, News Cafe in Newtown was het Madikane en sy medepligtigde, regter Sibanda aangestel om regsdienste te verskaf. Hy het, volgens hom die besigheid verloor, weens die twee “prokureurs.”
Madikane het vroeër in die hof aangevoer dat hy nie volgens die wet ‘n prokureur is nie, maar meen hy is deel van ‘n nie-winsgewende organisasie wat kliënte verteenwoordig.
In sy aansoek vra Madikane dat die advertensie ongrondwetlik en aanstootlik verklaar word. Die voorsitter van die DA se federale raad, Helen Zille het in ‘n onderhoud op Newzroom Afrika gesê dat die DA nooit ‘n regte Suid-Afrikaanse vlag gebrand het nie en dat dit slegs ‘n digitale prent was. Volgens haar is dit as ‘n metafoor bedoel.
Madikane hou egter vol dat die advertensie, volgens hom op haatspraak neerkom.
