Pretoria FM mag voortgaan om sy uitsendings na sy filiaalstasies te herlei. Die uitspraak deur die Onafhanklike Kommunikasieowerheid van Suid-Afrika (OKOSA) volg nadat die mediareus, Primedia `n klag teen Pretoria FM ingedien het omdat uitsendings ook na filiaalstasies herlei word. Dit sluit in Radio Wolkberg, Radio Kransberg, Radio Ysterberg, Radio Tafelkop, Radio Naboom en Radio Dagbreek. Primedia bedryf die radiostasies Highveld, 702, Cape Talk en KFM.
Volgens Pretoria FM se uitvoerende voorsitter, Willie Spies was dié klagte een in ‘n reeks klagtes wat Primedia teen ‘n aantal gemeenskapstasies gelê het. Vermoedelik om sy advertensie-inkomste te beskerm.
Okosa se klagtetribunaal het bevind dat PretoriaFM by magte is om op sy filiaalstasies uit te saai, en dat hy dit doen met die medewete van die kommunikasie owerheid
Spies sê die voorsittende beampte, regter Thokozile Masipa het in haar uitspraak melding gemaak van die gemeenskapsbelang wat die moederstasie en die herleistasies dien.
