27 Mei 2021
Die reeksverkragter, Sello Abram Mapunya is in die Noord-Gautengse hooggeregshof in Pretoria gevonnis tot vyf keer lewenslange gevangenisstraf plus ‘n bykomende 988 jaar, nadat hy gister aan meer as 100 aanklagte skuldig bevind is.
Nie een van sy vonnisse sal samelopend uitgedien word nie.
Mapunya het van 2014 tot 2019 sy reeksmisdade in Silverton, Nellmapius, Atteridgeville, Mamelodi en Olievenhoutbosch in Pretoria gepleeg. Hy is in Maart 2019 in hegtenis geneem.
Hy is deur regter Papi Mosopa skuldig bevind op 41 aanklagte van verkragting, 40 aanklagte van roof met verswarende omstandighede en 40 aanklagte van huisroof.
Sy jongste slagoffer was 14 jaar oud. Masopa het tydens die vonnisoplegging aan Mapunya gesê hy hoop dat dié vonnis ander misdadigers twee keer laat dink voor hulle soortgelyke misdade pleeg.
Hy meen Mapunya kan nie in vrede saam met ander mense leef nie.
