21 September 2023
Die burgerregteorganisasie, AfriForum het vandag ’n aansoek ingevolge die Wet op die Bevordering van Toegang tot Inligting by die Departement van Justisie en Konstitusionele Ontwikkeling, sowel as by die Departement van Openbare Werke en Infrastruktuur ingedien.
Volgens die organisasie hou die aansoek verband met die herstel van die Pretoria-landdroshof wat in Oktober 2010 in puin gelê is nadat ’n brand in ’n gedeelte van dié gebou uitgebreek het.
‘n Veldtogbeampte by AfriForum, Charné Mostert sê hulle eis nou volledige inligting oor die brand en die onderskeie departemente se betrokkenheid by die herstel van dié gebou.
Mostert sê ten spyte daarvan dat ’n tender vir die herstel van die hof al toegeken is en herstelwerk ingevolge die tenderooreenkoms reeds in Februarie 2015 moes begin, is geen herstel- of opknappingswerk tot dusver gedoen nie.
Volgens Mostert is die prosedures in die toekenning van die tender nagekom, maar die feit dat die afhandeling van herstelwerk reeds soveel jare lank al sloer, wek ernstige kommer.
Mostert hou vol dat die voortdurende vertragings om die hof te herstel beteken dat meer as ’n dekade se verdere verval van die gebou, jare se diefstal, vandalisme en verwaarlosing ook nou herstel sal moet word.
