10 Augustus 2022
Inwoners in Pretoria word gevra om tot die naweek water spaarsaam te gebruik aangesien die grootmaat waterverskaffer, Rand Water, die S4 waterpypleiding gaan afsluit om die pyp aan ‘n nuwe pypleiding te koppel.
Minstens twintig van die stadsraad se reservoirs – hoofsaaklik aan die noorde, ooste en suid-ooste van die stad – sal hierdeur geraak word.
Na verwagting sal die watertoevoer na die opgaartenks Donderdagmiddag (11 Augustus) om 17:00 toegedraai word en – as alles volgens plan verloop – sal die watertoevoer om 22:00 Saterdagaand (13 Augustus) weer oopgedraai word.
‘n Volledige lys van buurte wat hierdeur geraak word is op die Tshwane metroraad se webtuiste beskikbaar.
‘n Woordvoerder van die stadsraad, Lindela Mashigo, sê inwoners moet betyds genoeg water opgaar om aan hulle noodsaaklike behoeftes te voldoen en dat watertenkwaens op bystand sal wees vir alternatiewe waterverskaffing.
Kry die lys van geraakte woonbuurte hier.
