10 Mei 2024
Pretoria FM se Winterprojek – wat ten bate van die Wollies-diereskuiling in Pretoria-Noord van stapel laat loop is – het Vrydag 10 Mei op ’n hoogtepunt afgesluit toe bakkies, bussies en vragmotors vol honde- en katkos, komberse en troeteldierspeelgoed aan die diereskuiling geskenk is.
Carly Esterhuysen, wat aan stuur van dié projek staan, sê die idee het klein begin en gou in ’n golf van gee ontaard. “Ons besef die winter is op ons voorstoep en Wollies se nood is ongelooflik groot. Hulle benodig elke dag gemiddeld vier swart vullisdromme se kos net om die 700 honde wat tans daar versorg word te voer. Dis ’n reg-tot-lewe-skuiling en Cilla Trexler en haar span se harte is op die regte plek. Hulle versorg elke dier wat daar afgelaai word met die grootste deernis. Dís waarom ons Wollies vir ons Winterprojek gekies het.”
Esmarie Yssel, aanbieder by Pretoria FM wat deel was van die projek, sê die sukses van dié projek word toegeskryf aan die radiostasie se luisterfamilie. “Hierdie projek is tekenend van wie ons luisteraars is. Dis mense wat altyd – ongeag van hoe min of baie hulle het – ’n ruim hart en oop hand het. Ons sê dankie aan elke luisteraar wat ’n bydrae gemaak het. Julle maak van die wêreld ’n mooi plek,” sê Yssel.
Die klerehandelsmerk, Boerboel Wear, bekend vir hulle knap khaki broekies, het hande gevat met Pretoria FM en R15 000.00 aan Wollies oorbetaal. Hulle het ook ’n egte leersak ter waarde van R5,000.00 geskenk om luisteraars aan te moedig om skenkings vir die projek na Pretoria FM se kantoor in Loftus Park in Arcadia te neem.
Bostu Boerboele – die grootste boerboeltelers ter wêreld – het óók aan boord gekom en Thys en Chereen von Solms het ’n bussie vol Royal Canin-hondekos geskenk wat deur die Boerboel Wear-modelle afgelaai is.
Trexler het gesê dié reuseskenking red die skuiling in ’n tyd van nood, aangesien daar reeds vir een dag nie kos vir die diere was nie. “Ek het nie woorde om ons dankbaarheid na behore uit te druk nie. Wollies en ons diere is ’n roeping en daarom móét ons hulle goed versorg… Al wat ek uit my hart kan sê is baie dankie.”
Foto’s deur Bronwyn Keyter
