24 Januarie 2022
‘n Groot gees by Pretoria Fm, Faan Rabie is vanoggend omstreeks 02:30 in die ouderdom van 77 in die Unitas-hospitaal in Pretoria oorlede.
Oom Faan – soos hy bekend gestaan het – het die afgelope twee weke moedig geveg teen Covid-19. Hy was bekend en geliefd vir sy kontinuïteitskof Sondae vanaf 07:00 tot 17:00, wat programme soos Andantino en Goue Gunstelinge ingesluit het.
Rabie saai sedert Oktober 2002 by Pretoria FM uit. Hy was ook tot in 2012 die programbestuurder van Pretoria FM.
‘n Jarelange kollega, Jaco Versfeld sê oom Faan sal onthou vir sy liefde vir fietsry. “Hy was belese en baie lief vir musiek.” Pretoria FM se uitvoerende hoof, Hennie Koortzen sê hy sal oom Faan as mens, sy reuse bydrae by die radiostasie en sy positiewe leefwyse baie mis.
Die voorsitter van Pretoria FM se direksie, Willie Spies het namens die stasie sy medelye met oom Faan se naasbestaandes betuig. Oom Faan laat sy vrou Suzette, twee kinders en drie kleinkinders agter.
