31 Desember 2021
President Cyril Ramaphosa sê dat alhoewel Nuwejaarsvieringe saam vriende en familie ‘n opwindende tyd is, is dit ook ‘n tyd om terug te kyk na die jaar wat verby is en om mense te onthou wat in 2021 oorlede is.
Die president het vroeër vanmiddag in sy jaarlikse nuwejaarsboodskap gesê dat dit ook nou die tyd is om te fokus op 2022 en om persoonlike doelwitte saam te stel en om planne te maak vir die jaar wat voorlê.
“2021 was ‘n moeilike jaar vir Suid-Afrika en sy mense. Ons moes vir ‘n tweede jaar met ‘n dodelike pandemie saamleef. Talle mense het geliefdes aan die dood afgestaan, wat beteken daar is ‘n leë plek aan die eetkamertafel.”
Hy sê die Covid-19-pandemie het ook ‘n tol geëis op mense se persoonlike finansies asook die land se ekonomie. Duisende mense het hulle werke verloor, terwyl talle besighede hulle deur moes sluit.
President Ramaphosa het ook gereflekteer op ‘n sogenaamde tweede pandemie – naamlik geweld teen vroue en kinders. “Vanjaar het ons land ook tot ‘n totale stilstand gekom weens die grootskaalse onluste wat veral KwaZulu-Natal en Gauteng in Julie vanjaar getref het.”
Hy meen hy is hoopvol oor die jaar wat voorlê en meen die regering sien uit na ‘n beter 2022 as die afgelope twee jaar wat verby is.
“Ek wens vir elke Suid-Afrikaner en hul geliefdes ‘n voorspoedige nuwe jaar toe.”
