Pres. Cyril Ramaphosa trots op aantal jong mense, wat opdaag vir inenting

23 Augustus 2021

President Cyril Ramaphosa sê in sy weeklikse nuusbrief dat hy beïndruk is met die groot aantal mense tussen 18- en 34 jaar oud, wat reeds sedert Vrydag opgedaag het om teen Covid-19 ingeënt te word.

Hy sê ongeveer ‘n halfmiljoen 18-plussers het Vrydag – die eerste dag van die inenting vir dié groep – by inentingslokale opgedaag.

Hy het die inentinsproses vergelyk met hoe mense in lang rye gestaan het om in die eerste demokratiese verkiesing in 1994 te stem.

Volgens die president gee die jong mense die land hoop dat die Covid-19-pandemie vinnig iets van die verlede kan wees as almal opdaag vir hulle inenting. “Ek is beïndruk met die jong mense se entoesiasme en geesdrif. Ek was ook veral beïndruk met hul kennis van die entstof, die beskerming wat dit bied en hoekom dit noodsaaklik is,” sê hy.

Hy sê dit is nou die jeug se beurt om op te staan en om ‘n standpunt in te neem teen Covid-19 en die belangrikheid van die entstof.

Meer as 10-miljoen mense het reeds inentings ontvang, waarvan byna 5-miljoen mense ten volle ingeënt is.

From The Desk of The President – Monday, 23 August 2021 – https://t.co/EFkZpG2vOO Today, I want to speak to the young people of South Africa. Young people are turning out in impressive numbers to get the COVID-19 vaccine. pic.twitter.com/PzZq9V4fQs

— The Presidency 🇿🇦 (@PresidencyZA) August 23, 2021