20 Junie 2023
Die premier van die Wes-Kaap, Alan Winde het die Provinsiale Rampbestuursentrum, en ander wetstoepassers bedank vir hulle vinnige optrede nadat kitsvloede in groot gedeeltes van die provinsie voorgekom het.
‘n Reeks kouefronte het tussen 14 en 19 Junie tot swaar reënval gelei, wat kitsvloede tot gevolg gehad het. Die Kaapse Wynlande en die Weskus is veral erg geraak.
Volgens Winde was die Wes-Kaapse regering aanvanklik gefokus op die beskerming van lewens en om kos en ander produkte by slagoffers van die vloede te kry, maar sal nou die kostebepaling van die skade en die herbou van infrastruktuur prioritiseer.
“Die rampbestuursentrum se personeel het jarelange ervaring om skade weens hierdie tipe ekstreme, weersomstandighede te bestuur, en was suksesvol om verskillende reddingspanne te koördineer.”
Hy het bevestig dat twee mense hulle lewens in die vloede verloor het.
