28 Februarie 2023
Die minister van openbare ondernemings, Pravin Gordhan sê hy gaan nie enige name bekend maak van hoë profiel persone wat by korrupsie en bedrog by Eskom betrokke is nie.
Gordhan het erken dat André de Ruyter aan hom sekere individue genoem het wat vermoedelik Eskom plunder.
Hy sê hy gaan egter nie enige name noem nie, omdat hy moontlik van laster aangekla kan word, en omdat dit als steeds net bewerings is. Gordhan sê hy sal vir De Ruyter wag om met die inligting vorendag te kom, soos die ANC ook versoek het.
Die DA leier John Steenhuisen het intussen ‘n beroep op de Ruyter gedoen om die name van die hooggeplaaste ANC-politici in die parlement bekend te maak.
Hy sê indien die name nie bekend gemaak word nie, kan hulle geregtigheid vryspring deur die land soos die Gupta-broers te verlaat.
Steenhuisen sê daar moet minstens op die individue se paspoorte beslag gelê word.
Hy sê de Ruyter sal ingevolge parlementêre privilegie beskerm word en sal nie die gevaar van siviele vervolging loop soos wanneer hy dit in die openbaar bekend maak nie.
