2 Desember 2022
Die staatsbeheerde passasierspoormaatskappy, Prasa is steeds besig met sy soektog na spookwerkers nadat duisende onidentifiseerbare werkers op sy betaalstaat uitgeken is.
Die minister van vervoer, Fikile Mbalula, het vandeesweek in antwoord op ‘n geskrewe parlementêre vraag gesê dat ‘n ondersoek na die vermeende spookwerkers 2143 werknemers as verdag gemerk het – met inbegrip van 1480 wat nie fisies geverifieer kon word nie.
Dit het ook aan die lig gekom dat meer as 1100 werkers aan die begin van die ondersoek bedank het.
Tydens dié ondersoek is verdagte werkers se salarisse bevries in ‘n poging om die werkers te dwing om die nodige dokumentasie voor te lê.
Die ondersoek word uitgevoer met die ondersteuning van Binnelandse Sake, die Suid-Afrikaanse Inkomstediens, Umalusi en die Suid-Afrikaanse Kwalifikasie-owerheid, SAKO.
