11 Januarie 2023
Meer besonderhede oor die afleggings wat by die Poskantoor gaan plaasvind het aan die lig gekom nadat dié instelling begin het om artikel 189-kennisgewings aan personeel uit te reik.
Die Poskantoor is in Julie verlede jaar in sakeredding geplaas – nadat daar aanvanklik gepoog is om die onderneming te likwideer – weens voortdurende verliese te midde van dalende produktiwiteit.
Afleggings gaan op alle vlakke binne dié organisasie plaasvind en in die artikel 189-kennisgewing word daar ook daarvan melding gemaak dat die organisasie te veel senior bestuurders het.
Die meeste personeel – tussen 2 500 en 3 000 – wat aflegging in die gesig staar is by klainhandeltakke in diens.
Volgens ‘n brief wat deur die Poskantoor uitgereik is, kan hierdie afleggingsproses tot nagenoeg 6 000 werknemers se afleggings lei.
