22 November 2022
‘n Polisierekruut is glo per ongeluk tydens ‘n opleidingsessie in Limpopo doodgeskiet.
Die woordvoerder van die Onafhanklike Polisie-ondersoekdirektoraat (Opod), Lizzy Suping, sê die rekrute het Sondag taktiese en gevegsopleiding by die Thabazimbi Tactical Academy ondergaan toe die voorval plaasgevind het.
Beide Opod en die polisie ondersoek tans die omstandighede wat tot die ongeluk gelei het.
Daar word intussen op sosiale media beweer dat ‘n instrukteur aan rekrute wou wys hoe om ‘n vuurwapen te hanteer toe ‘n skoot per ongeluk afgegaan het.
Maroela Media berig dat Suping egter nié hierdie bewering bevestig het nie. Sy sê die ondersoek moet eers afgehandel word voordat meer inligting oor die voorval bekend gemaak kan word.
Die Nasionale polisiekommissaris, genereaal Fannie Masemola het ook intussen ‘n dringende ondersoek na die gebeure geëis. Berading word tans voorsien aan alle betrokkenes.
