28 Februarie 2024
Die nasionale polisiekommissaris, generaal Fannie Masemola, vra vir wysigings aan die Strafproseswet wat beamptes meer mag sal gee om hul vuurwapens te gebruik wanneer hulle hulself in gevaarlike situasies bevind.
Masemola was een van die sprekers by die nasionale konferensie van die Geïntegreerde Strafregstelsel en die Hersiening van die Strafproseswet in Boksburg.
Hy het aan belanghebbendes by die konferensie gesê ‘n toenemende aantal polisiebeamptes word vermoor.
Volgens Masemola sterf wetstoepassers met hul vuurwapens in die skede omdat hulle huiwerig is om dit te gebruik.
Tussen April en Desember 2023 is agt-en-tagtig polisiebeamptes vermoor – drie-en-dertig terwyl hulle aan diens was.
