31 Oktober 2022
Die VF Plus is van mening dat rooftogte by polisiekantore ʼn groot bron van onwettige vuurwapens in die hande van misdadigers geword het.
Dit blyk uit die antwoord van die minister van polisie, Bheki Cele, op ʼn parlementêre vraag van die party se leier, dr. Pieter Groenewald.
Volgens die skriftelike antwoord van die minister was daar vanaf 1 April 2018 tot 31 Maart 2021 dertien rooftogte by polisiekantore waarin 78 vuurwapens en byna ‘n 1000 rondtes ammunisie geroof is.
Groenewald sê behalwe die rooftogte – wat bewys dat misdadigers nie die polisie vrees nie – is dit ontstellend dat nie ʼn enkele een van die vier-en-twintig verdagtes wat in hegtenis geneem is, tot op hede suksesvol vervolg is nie.
23 van die vuurwapens is aanvalsgewere en veertig is 9mm-pistole.
Groenewald het ook die minister se syfers bevraagteken.
