2 Oktober 2023
Die onlangse Brics-beraad het die land R75-miljoen gekos, net vir die polisiebeamptes wat tydens die beraad ontplooi is.
Die minister van polisie, Bheki Cele het die bedrag in ‘n parlemêntere antwoord bevestig.
Volgens Cele is daar meer as 5 200 beamptes vir die beraad ontplooi, en 726 polisievoertuie is gebruik. Hy het verder in sy antwoord gesê dat daar nie ander voorsorgmaatreëls was nie, slegs die polisiebeamptes wat ontplooi is.
Die minister van internasionale betrekkinge, Naledi Pandor het intussen gesê die totale koste van die beraad, wat tussen 22 en 24 Augustus gehou is, moet nog bereken word.
Die DA-LP en woordvoerder oor internasionale betrekkinge, Emma Louis Powell sê die party gaan binnekort dringende vrae by die parlement indien waarin hulle antwoorde eis oor hoeveel die Brics-beraad belastingbetalers uit die sak gejaag het.
