7 Mei 2021
Die vakbond, Solidariteit het die uitslag van ‘n interne dissiplinêre verhoor van twee lede van die Suid-Afrikaanse Polisiediens verwelkom nadat hulle luitenant-kolonel Annemarie Oosthuizen valslik daarvan beskuldig het dat sy hulle die k-woord toegesnou het.
Die verhoor volg nadat dié twee beamptes verlede jaar skuldig bevind is aan meineed, regsverydeling, aanranding en crimen injuria waarvoor hulle onder andere opgeskorte gevangenisstraf opgelê is.
Die sektorkoördineerder van die openbare sektor by Solidariteit, Renate Barnard sê hoewel hulle verheug is oor die uitspraak, hou hulle steeds die gebeure binne die SAPD rakende die adjudant-offisiere dop.
Die provinsiale kommissaris van die SAPD moet nog na afloop van die verhoor die uitspraak bekragtig wat die ontslag geldig sal maak. Dit is volgens Barnard belangrik dat hierdie proses wel gebeur.
Volgens Solidariteit het die SAPD vier jaar lank versuim om op te tree teen dié twee.
