8 April 2022
Twee polisiebeamptes is in hegtenis geneem nadat hulle vermoedelik aandadig was aan ‘n gewapende rooftog van die poskantoor – wat reg oorkant die polisiestasie geleë is.
Die voorval het Woensdagmiddag in Macassar – aan die buitewyke van Kaapstad – plaasgevind.
Sewe ander verdagtes – almal tussen die ouderdomme van 21 en 47 jaar – is ook in verband met die rooftog aangekeer.
Die woordvoerder van die polisie, sersant Wesley Twigg sê die verdagtes het elektroniese toerusting en ‘n onbekende bedrag aan kontant gebuit.
Behalwe vir die ondersoek na die rooftog sal die polisie-waghond, OPOD, ook die wetstoepassers se betrokkenheid by die rooftog ondersoek.
