26 Januarie 2023
‘n 35-jarige polisiebeampte van KwaZulu-Natal is in hegtenis geneem nadat hy na bewering nalatig op die N3-hoofweg bestuur het.
‘n Video waarin daar gesien kan word hoe ‘n gemerkte polisievangwa teen ‘n hoë spoed ry, die padreëls verontagsaam én teen ander voertuie stamp is gister wyd op sosiale media versprei.
Volgens die polisiewoordvoerder in KwaZulu-Natal, kolonel Robert Netshiunda, is interne dissiplinêre stappe reeds teen die sersant ingestel, wat tydens die voorval aan diens was.
Volgens Netshiunda is die beampte verbonde aan die Newcastle honde-eenheid. Hy is na bewering reeds op 13 Januarie in hegtenis geneem op aanklag van dronk en nalatige bestuur.
