7 Julie 2021
Die departement van polisie sê hy sal wag vir direktiewe van die Grondwethof voordat hy ‘n besluit sal neem of hy Zuma vandag in hegtenis sal neem of nie.
Die minister van polisie, Bheki Cele en die nasionale polisiekommisaris Khehla Sitole is deur die Grondwethof beveel om Zuma teen vandag om middernag in hegtenis te neem, nadat hy skuldig bevind is aan minagting van die hof en tot 15 maande gevangenisstraf gevonnis is.
Cele het egter in ‘n brief aan die Grondwethof gesê dat hy sal wag tot die huidige regsaksie sy gang gegaan het, voor hy uitvoering sal gee aan die bevel om Zuma in hegtenis te neem.
Intussen geld die Grondwethof se bevel nog, en indien Zuma nie in hegtenis geneem word nie, sal beide Cele en Sitole skuldig wees aan minagting.
Uitspraak is gister voorbehou in die Pietermaritzburg hooggeregshof in Zuma se aansoek om sy inhegtenisname ter syde te laat stel, hangende die aanhoor van sy pleit in die Grondwethof eerskomende Maandag.
Regter Bhekisisa Mnguni het aangedui dat hy Vrydag uitspraak sal lewer.
